काठमाडौं ।
सर्जक गणेश रसिकको १० औँ दिनको पूण्य तिथिका अवसरमा वासु शशी स्मृति परिषद्ले शुक्रवार श्रद्धाञ्जली सभा आयोजना गरी रसिकप्रति भावपूर्ण श्रद्धाञ्जली अर्पण गरेको छ ।
परिषद्की उपाध्यक्ष हिरण्यकुमारी पाठकको सभापतित्वमा आयोजित सो श्रद्धाञ्जली सभामा सर्जकहरु बुलु मुकारुङ्ग र लोचन भट्टराईले रसिकको योगदानको चर्चा गर्दै गायिका लोचन भट्टराईले रसिकका गीत गाएर सबैलाई भावुक बनाएका थिए ।
परिषद्का सल्लाहकार राधेश्याम लेकालीले रसिकबारे विभिन्न चर्चा गर्दै उहाँको योगदा बारे चर्चा गर्नु भएको थियो ।
सभामा वासुशशी स्मृति परिषद्का सदस्य सचिव प्रद्युम्न जोशीले स्वागत मन्तव्य गर्दै सो कार्यक्रममा कविहरु ठाकुर बेलवासे, रचना सिंह र दिलीप श्रेष्ठले रसिकबारे लेखिएको कविता वाचन गरेका थिए ।
सभाको सहजीकरण कवि यादव भट्टराईले गरेको सो सभामा रसिककी छोरी नीरजा रसिक राई, सर्जकहरु मदनदास श्रेष्ठ, शैलेन्द्र साकार, प्रेमराजा महत, पवन आलोक, श्याम प्रधान, तीर्थ कोइराला, श्रीओम श्रेष्ठ, जयदेव भट्टराई, प्राज्ञ बाबा बस्नेत, प्रा. डा. गोविन्दमान सिंह कार्की, सन्ध्या पहाडी, मुरारी सिग्देल, उद्दव राई, विजयध्वज थापा, सुदर्शन श्रेष्ठ, शेखर ढुंगेल, देविका तिमिल्सिना, विक्रमभक्त जोशी, तारा सुवेदी, पारशप्रकाश नेपाल, राजेश खनाल, जय छाङ्छा, रिता महर्जन, उषा के सी., राधा कार्की, डी. आर. राई., ठुले राई, राजन न्यौपाने, कविता दाहाल लगायतको उपस्थिति रहेको थियो ।
रसिकको ७८ वर्षको उमेरमा २०८२ जेठ १८ गते नेपाल क्यान्सर अस्पताल, हरिसिद्दि, ललितपुरमा प्रोस्टेट क्यान्सरको उपचारको क्रममा देहावसान भएको थियो ।
कविता, कथा, उपन्यास, संस्मरण, निबन्ध लगायत विधामा कलम चलाउनु भएका रसिकका झोडा, क्षितिजलाई छुन खोज्दा, एउटा सारङ्गीभित्र, जब सिस्नुहरु टेक्दै हिंडे, दस गजामा उभिएर जस्ता कृतिहरु प्रकाशित रहेका छन् । यसका अलावा पेरुङ्गो (मुनिया र उसको छोरो, ताराभन्दा सपना धेरै, आकाशगंगाको ओतमुनि, छपक्कै मनमा बसेकाहरु)मा उहाँका कृतिहरु प्रकाशित रहेका छन् ।
"पाँचौ पिंढी"को सम्पादन गर्नु भएका रसिकका अनेकौ कालजयी गीतहरु प्रकाशित रहेका छन् । कतिपय गीत रचना गर्नु भएका सर्जक रसिकले नेपाली लोक शैलीका गीत र राष्ट्रिय गीतहरुमा आफ्नो स्वर र संगीत दिनु भएको छ ।
रसिकका घरबेटी नानी आँगनीमा देऊ न मलाई बास, नखेल्नु जुवा र तास, भाले क्वाँया क्वाँया, ओ याङ्जी नाना, धेरै सम्झे धेरै हुन्छ, हाम्रो घरबाट ट्याम्के डाँडा, ओ शून्यता, रातो जस्ता गीतहरु चर्चामा रहेका छन् ।
रसिक गीत लेखन तथा गायनका बहुआयामिक व्यक्तित्व हुनुहुन्छ । एउटा गीतकार, एउटा सङ्गीतकार र एउटा गायक रसिक भोजपुरको छिनामखुमा वि. स. २००४ असोज ४ गते थुलुङ राई परिवारमा जन्मिनु भएको हो ।
